Pax in terris hominibus

[Thomas "ioculator" Vulpius]

Salvete, pedifollis ludi fautores!

 

Certamine pedifollis inter Germanos et Italos confecto nulli Germani - nescio quo pacto - cervisiae pleni per vias titubabant.Clamores in viis non erant. Autocinetorum tubarum clangores non audiebantur. Vexilla colorum atri, rubri flavique autocinetis affixa non erant. Barbari Germani maesti domi remanserunt neque victōriā ŏvābant.

 

Quies mihi erat. Nullo strepitu intercedente domi sedebam et linguis antiquis studebam. Gratiae sunt agendae Romanis, qui barbaros Germanos pedifolle vicerunt. Si Romani etiam antiquis temporibus Germanos vicissent, Germania in provinciam redacta esset, lingua Germanorum facta esset Romanica, discipulis nostris multo facilius nunc esset vocabula Latina discere.

 

Ab Iove optimo maximo posco atque flāgito, ut efficiat, ut Silvius Berlusconius, imperator Romanus, legiones signa inferre in Germanorum barbariem iubeat. Tum barbari nostri non iam in tabernis cervisiae pleni sederent et pedifollis certamina tēlōpthēriō spectantes āthlētās adhortarentur magnā vōce clāmantes, sed in acadēmiis linguam Latinam strenue discerent.

 

Si deus est et is deus Iuppiter est, efficiat, ut linqua Latina ubique terrarum in scribendo loquendoque adhibeatur.

 

Quam ob rem mihi persuasum est eum lignarium Iudaeum, qui a Romanis cruci affixus vel agglutinatus esset, filium dei non fuisse. Si enim ille lignarius eiusque pater, qui omnipotens esse dicitur, dei veri essent, effecissent, ut lingua Latina omnibus mortalibus admirationi esset - id quod hoc in mundo non fit, sed in eo orbe lacteo, qui "Andromeda" nuncupatur. Omnes enim eius orbis lactei incolae linguam Latinam praeter modum admirantur. Quod lignarius ille atque eius pater gloriam et dignitatem imperi Romani neglegunt atque contemnunt, periculum nunc exstat, quominus alienígenae spatium intergalacticum navigiis spatialibus perlapsi ad hunc mundum perveniant omnium barbarorum, qui Latine nesciant, interficiendorum causā.

 

Abicite igitur pedifolles vestros! Adite acadēmias! Discite linguam Latinam! Sin aliter, armis lāseriscis (Britannice "laser weapons") mox interficiemini.

 

Revocate ad animos vestros Martini Zythóphili, poetae praeclarissimi, versūs!

 

Milia multa hominum poscunt spectacula saeua
    circensesque uiris praebet arena capax.
Proelia committunt lusuque pilaque cohortes
    undenique uiri prata uirentia arant.
Finibus in Scythicis hoc tempore talia fiunt
    et certaminibus gaudet ocellus ouans.
Nec satis est, quae fit per pratum, rixa quibusdam
    proque cohorte sua post sua bella gerunt.
Nec pila missa placet nec laetor cruribus amens
    uel quod tot pedibus laeditur herba uirens.
Mensis, ab insigni qui traxit Caesare nomen,
    finiet hos lusus: Tunc requies mihi erit!

 

Quid dicam de vemortuis (Britannice: the undead)? Nonne ii e tumulis surgent et per vias vacillantes vivos dilacerabunt et devorabunt? Vemortui omnes, qui sibi obviam facti erunt, Latine interrogabunt, utrum vivi an mortui sint. Eos quidem, qui se esse mortuos responderint, non aggredientur; Latine autem nescientes, quod recte non responderint, dilacerabunt et devorabunt. Discite igitur linguam Latinam! Sin aliter, exta vestra in vemortuorum stomachis mox concoquentur.

 

Quid de ectoplasmate? Nonne ii, quorum in aedibus ectoplasma appāruit, a perpetuo redincarnationum circulo liberabuntur et post mortem in provinciā astrali versantes sempiternā atque intergrā beātitudine fruentur? Atque hoc inter omnes constat in eorum, qui Latine loquantur, aedibus multo saepius ectoplasma appārere quam in ludi pedifollis fautorum? At ii, qui, cum vivunt, linguam Latinam neglexerint, renascentur et multas vitas miserrimas agent.

 

Quid de deā Durgā? Quis vestrum est, qui dominatricem meam descensionem vel incarnationem eius deae esse nesciat? Ea, quam nominatim appellari fas non est, eos, qui, cum viverent, linguae Latinae strenue operam dedissent, a perpetuo redincarnationum circulo se liberaturam esse saepius iam dixit. Homines autem incultos atque rudes multis incarnationibus se affecturam esse. Mihi credite! Obliviscimini linguae Britannicae! Tenemini undique. Expavescite eam! Parete eius imperatis! Discite linguam Latinam! Sin aliter, interficiemini ut Mahisasura, bubalorum daemonum rex. Illud enim monstrum astrale, quod socia astralis est mea, sola bubalorum daemonum exercitum devicit atque eius regem interfecit. 

 

Harum autem rerum formidulosarum una est exceptio: ii scilicet, qui Hungarice numerant, non interficientur. Tanta enim perversitas in Hungarice numerando inest, ut ne dea Durga quidem homines Hungarice numerantes interficere audeat.

 

Satis id, quod erat propositum, demonstrasse videor. Habetis igitur meum de pedifollis ludo iudicium. Quid nunc faciendum sit, animis vestris deliberate! Totos igitur et animis et corporibus nos conferamus in Latine loquendum! Quod qui non fecerint, morte cruentā obibunt - aut armis lāsericis combusti aut ā vemortuis dilacerati  aut ā deā Durgā falce discissi. 

 

Sed de his rebus quidem hactenus, ne nimius in hoc genere videar!

 

Bene valete!

Thomas vester, ioculator grammaticalis, pedifollicus, imperialis, ectoplasmaticus, alienigenicus Hinduisticusque