Exercitatio epistolaris IV: Commendatio altera

[Halfdanus Norensis]

Gunnilda Hulerici Satanae regi inferorum salutem dicit.

            Quamquam mihi haud ita carus fuistis, mi Domine, et nihil honoris vestri causa umquam feci, ad vos nunc scribo ut suppliciter unicum beneficium a vobis petam. Cum pleraeque viduae Sanctum Petrum precentur, vos solus, lo ’mperador del doloroso regno, potestis ferre opem mihi. Sic enim res se habent: Maritus meus, geometra nomine Hudelricus Iohannis, moriturus est. Presbyter noster communalis ei per dies salvationem precatus fecit ut Hudelricus peccata sua confessus sit. Orationem optimam medicinam postulat iste et sperat fore ut maritus in regnum caelestem tandem ascendat ubi felix beatusque erit per saecula saeculorum.

Rogatis fortasse quam ob rem hoc vestra referat. Explicabo igitur, mi Domine: Nisi vultis regnum vestrum optimo furcifero carere, asciscite hunc Hudelricum Iohannis maritum meum in civitatem vestram et prohibite eum in caelum admitti. Est enim talis homo ut ametur a vobis, summa animi pravitate et maximo dedecore. Hic vir mihi semper erat inimicissimus quod rationem cottidie habet non mei, non familiae, sed cylindrorum, trigonorum tetragonorumque suorum. Insuper soccos foedentes iterum atque iterum per domum iacentes liquit. Est ergo praeditus incredibili turpitudine et dignus qui hospitio vestro utatur. Mihi pergratum erit, si Hudelricum consuetudine devinxeritis et eum stagno ardenti igne et sulphure inieceritis, sin minus, mihi placeat eum elinguari aut exoculari. Bene scio vos quam maximo manum numero legiones supplere velle, et sincere promitto hunc Hudelricum Iohannis arma ferre valiturum ubi bestia quae ascendit de abysso faciet adversus illos bellum. Etenim apparet et exstat geometram quemlibet artis suae studiosum magno usui vobis futurum.

Dum haec scribo, Hudelricus non sepultus, ne mortuus quidem est, sed cum tempus erit hanc epistolam in manum eius ponam. Opinor, mi Domine, hoc desiderium insolitum esse (aut fortasse non), sed me obligabitis si hoc gratum mihi feceritis, et vobis aliquo beneficio meritam pro eo gratiam referam. Ita novum scelus habebitis et in terra et apud inferos, et duos parietes de eadem fidelia dealbabitis.

Vos bene salvere iubeo, saltem donec maritum curaveritis. Valete.