Iohannes Stephano s.p.d.

Tibi gratias magnas propter verba benevola, in quibus tamen plus est urbanitatis quam veritatis quia tu ipse certissime elegantius quam ego Latine scribis.

Situm interretiale scholae tuae inspexi, ubi et magistri et  discipuli vitam simplicem sed iucundissmam agere videntur. Imaginem tua,. tamen, non vidi. Fungerisne munere regulari an es instructor externus?

Ipse iam plus viginti annos Honcongi, quod nunc est `Regio Administrativa Specialis Reipublicae Popularis Sinicae' habito.  Divisa est regio nostra, ut olim Gallia, in tres partes principales, scilicet Honcongum insula, Novemdracones et Terrae Novae (Anglice `New Territories'). Britanni Honcongum insulam anno 1841, Novemdracones (paeninsulam ad insulam spectantem) anno 1860 ceperunt. Terras Novas autem, quae sunt pars maxima regionis, non in dicionem perpetuam redigerunt sed anno 1898 ea condicione conduxerunt ut post nonaginta novem annos imperio Sinico redderentur. Cum copiae aquarum et multae aliae res necessariae in Terris Novis erant, anno 1997 non potuit fieri quin omnes tres partes regimini Sinico  traderentur. Secundum foedus inter Britannos et Sinenses factum, tota regio autonomiam internam habet, systema economicum legaleque per quinquaginta annos non mutari poterit. De vita Honcongensi multa in parte inferiore paginae http://linguae.weebly.com/circulus-latinus-honcongensis.html legi possunt.

Ipse usque ad anum proximum praeteritum in lycaeo magister eram linguae Anglicae, nunc discipulos privatos Latinam Anglicamque docere pergo. Investigationes, ut antea, de historia et rebus politicis reipublicae Nepali facio. Uxor mea filiaque Honcongi natae sunt, nos interdum ad Britanniam itinera facimus sed Honcongi habitare pergemus.

Optime valeas