Georgio Gulielmus salutem dicit plurimam;

 nulla fere transit dies, qua aliquid ope eorum qui in academia Vivarii Novi versantur excogitatum non legam: cum libri rationibus instructis oerbergianis ad utramque linguam ediscendam, tum symbolae enchiridiaque quibus pagina retiali vestra abundat, ea omnia magno sunt mihi auxilio ut et linguas et litteras addiscam latinas graecanicasque, quoniam nullam aliam exstare mihi persuasum est viam, qua linguae illae peti eorumque uberes fructus colligi possint, nisi eam qua vos utimini, exemplum humanistarum secuti. Rursus hodie prae oculis habui fasciculum illum, ante annum forte foras datum, qui Mercurius inscribitur; et hodie rursus maestus dolui de iniqua illa sorte, qua fit ut nondum secundus legi possit fasciculus, quo tam opiparae significabantur inesse symbolae, nempe de percontatione cum Michaele ab Albrecht, deque conscribenda litterarum latinarum recentioris aevi historia! Equidem facile mente fingere possum vos nullis, nisi gravibus impediri causis: neque fastidiis fastidium unquam ipse addere velim novum. Si tamen fieri potest, seu de fatu illius lepidi opusculi, seu de mente consiliisque super hac re vestris, certior fieri cupiam, utpote qui vestrum, quanquam longinquus ac fere vobis ignotus, sim amantissimus, vestraque incepta diutina prosequar admiratione.

Fac pancratice valeas!

Salve Georgi optime!

Quid, quaeso, paginae retiali domus editoriae Vivarii Novi accidit? Iam dudum mihi conanti situm illum petere in quo multo cum profectu quam plurimi libri tum scriptorum antiquorum, tum aliarum rerum ad latinitatem attinentium, omnibus latinam linguam discere cupientibus ostenduntur, talia facere consueta data interretiali inscriptione non licet, cum alioqui paginas academiae et invenire et intrare solito more liceat. Estne hoc vitii meo ordinatro inputandum? Quanquam non sum harum computatralium rerum valde peritus, paginae domus editoriae non iam extare videntur. Valeas basilice!