de Capellani libro...

[Gulielmus Monetti]

Librorum qua est mea edacitate, postquam compertum habui librum adhuc apud suum typographeum emi posse cui titulus italice Parlare latino oggi. Conversazione moderna nella lingua di Roma (auctore Capellano, curantibus editionem italicam Claudio Ferone Henricoque Renna, e librorum serie "adiumenta"), quem frustra in bibliothecis Athenaei oppidique quaesiveram, epistolà electronicà ad domum editoriam neapolitanam missà ea significavi quae, quum nequaquam in eiusdem typographei pagina retiali ostenderentur, sunt ad librum emendum necessaria: pretium scilicet, exemplaria utrum haberent annon et porro. Illius italicae editionis alliciebat enim maxime annotationum copia, qua, excussis fere singulis, ut videtur, verbis, auctorum antiquorum omnes fere loci demonstrantur unde auctor verborum copiam locutionumque prompserit. At frustra. Post aliquot menses, ne singulo quidem responderunt verbo. Unde capi licet vel eos nullum habuisse exemplar, vel ne urbanitatis quidem larvam affectare voluisse.

Qua re a te, lector benevole, quaero: audivistine de illo libro? Scisne quo pacto, quae per deverticula flexionesve, rimas et strophas, comparari possit?

 

 

 

 

PS: si quae menda, ne diu emendatorem expectent!

[Gulielmus Monetti]

...significavi, immo petivi, ut rectius dicam.

 

[Aloisius]

Aloisius Guilelmo suo s.p.d.

Primum omnium, mi Guilelme, veniam a te petere velim multam, quod, innumeris negotiis oppressus et paene hisce diebus dilaceratus, ad pulcherrimam epistulam  tuam iam pridem missam nondum respondi: scito tamen mihi litterae tuae semper gratissimas esse, quippe quae animum cum nobilissimum, tum vere bonarum litterarum humanitatisque in universum amantissimum prodant.

Librum, quem appetis, ex ipso Henrico Renna, viro optimo, repetere poteris, epistula sive Italice sive Latine missa. Inscriptio vero cursualis est: [e-mail]

Nonnulla, ut credo, exemplaria adhuc ei praesto sunt. Habet etiam ipse de Graece hodie loquendo ("Parlare greco oggi") quaedam etiamnunc volumina.

Haec festinanter: ignosce mihi raptim et fere in transitu scribenti. Plura tibi, et quidem per cursum privatum, mittam, ubi primum in quandam a negotiis libertatem vindicatus ero. Tu vero cura ut quam optime valeas cum tuis omnibus, et conare ad nos per aliquod saltem temporis spatium venire. Te enim, eiusdem rei publicae litterariae civem, desideramus, te exspectamus, te videre iterum omnes cupimus.

[Gulielmus Monetti]

Aloisio Gulielmus s. p. d.

 Gratias pro tua in me benevolentia ago tibi, Aloisi, maximas. Domino Henrico Rennae scripsi. Aliquot audire ab illo verba, quaecumque erunt, gestio. Magno gaudio est mihi nosse te meis litterulis delectatum, quanquam menda quaepiam in illis detegi, quae nunc data emendatione corrigere velim: "primum semestrem nondum emensus..."; "mihi videbar summam... arcem aggressus"; "erga nescioquae... fragmenta"; "harum... per se patere ignorantiam." "vereor ne putes...". Ut omnes forte qui per se latinam graecamque linguam discere coguntur, semper timeo ne in aliqua menda inscius labear: mihimet optimus allumnus, pessimus vero magister sum!

optime vale

 

[Stanislaüs]

Stanislaus Gulielmo s. d.

Estne tibi fortasse in animo in formam electronicam illum librum præclarum convertere ubi eum comparaveris? ::) Equidem primam tantum vel secundam ejus editionem repperi, quibus index fontium deest.

[Gulielmus Monetti]

Heu, nondum ille mihi respondit vir, mi Stanislae.